【千祈咪学】9个情侣嗌交大忌！-金句王-求知网

点击上方 ↑↑ 即可「金句王」「除非你是我，才可与我常在」正正因为佢唔系你，所以佢冇可能完全明白你。当两个都有自己一套谂法嘅独立个体走埋一齐，

点击上方 ↑↑ 即可「金句王」

「除非你是我，才可与我常在」正正因为佢唔系你，所以佢冇可能完全明白你。当两个都有自己一套谂法嘅独立个体走埋一齐，就会有机会意见不合。

如果咁啱一个净系会就人，另一个净系俾人就，当然冇问题啦（睇落），否则，会嗌交都好正常。但嗌过交嘅人都知，有时唔系因为件事唔开心，系因为嗌交果阵，大家因为冲动而讲多咗或者做多咗。明明仲好爱对方，但无端端因为咁而受伤，你话系咪好无谓先？所以一定要注意以下9个嗌交大忌，千祈千祈千祈唔好学呀！

1. 讲粗口，踩低人

嗌交果阵通常都会处于极度愤怒嘅状态：一嬲就会失控，一失控就会乱讲嘢，粗口或者啲好难听嘅说话就会喺你哋把口到讲出嚟。讲果个可能只系冲动，但听果个会好在意。

2. 讲分手/讲离婚

唔讲粗口嘅话会讲咩？讲分手或者嗌离婚咯。唔好以为一句半句好似冇乜所谓，有啲嘢讲咗出口就收唔返。尤其系果啲动不动就「分手咯」嘅人，对方可以当你第一次系讲笑，第二次都系讲笑，第三次仲系咁，佢就会回应你「你讲架，咁分啦」，到时你就挽救唔到架喇。

3. 重提旧事

有啲情侣嗌交好兴拎返以前啲嘢嚟讲，明明当初话冇事，一嗌交又会话你上次又系咁咁咁。一件叠一件，已经唔再记得今次嗌交系因为咩事，然后下次又会提返今次件事，无限循环。

4. 你以前唔系咁…

承接上一点，有情侣会拎返初相识嘅事嚟讲：「一开始你追我果阵唔会咁架！」其实拍咗咁耐拖，相处模式点都会有少少唔一样，你话佢变咗嘅同时，有冇谂过其实你都唔同咗？

5. 比较

话完佢以前唔系咁，就会讲埋人哋另一半点点点。但果个系人哋另一半，人哋同你都唔同啦，点可以拎人哋另一半同你另一半比较呢？更甚者，会拎埋个Ex嚟比较。

6. 失踪

熄晒手机，断晒所有通讯工具，好似人间蒸发咁，其实系会令对方好担心。或者对方发现自己有错，好想同你道歉，好想同你讲清楚呢？你无端端失踪对嗌交哩件事百害而无一利，何必呢？

7. 搵异性「朋友」倾计

特登括住朋友，系因为你知果个人唔系想同你做朋友咁简单。搵异性朋友倾计分享当然冇问题，但假如对方其实一直都对你有意思，而你并唔想同佢发展落去的话，可能就要避忌吓。你都唔想对方误会，令你无意间又伤害多一个甚至更多人架嘛系咪？

8. Post上网

有人会喺同另一半嗌交之后，将所有嘢放上网站俾人睇。台湾人会将哩类归类为「讨拍拍」文，即系形容发文者纯粹想寻求安慰。嗌交明明系两个人嘅事，因为其中一边想有人「拍拍」而一下子变成全个网络世界嘅事，帮唔到对情侣不特止，反而令两边都受伤。

9. 郁手郁脚

最最最唔应该学一定系哩一点。语言暴力已经有好大伤害性，肢体暴力更加唔要得，凭咩对人郁手郁脚？拳脚冇眼，嬲起上嚟嘅无情力可能超乎想像。赢咗场交，输咗段关系，值得咩？

嗌得交一定已经好嬲同好失望，但你点都仲有啲啲理性，所以下次不妨问问自己「系咪仲想一齐行落去？」如果系嘅话，就应该一齐谂办法解决问题；唔系嘅话就分开啦，仲嗌嚟做乜先？所以话，嗌交其实有啲无谓，好好经营哩段得来不易嘅感情好过啦！